In Welkom het die teenbende-eenheid ’n man vir dwelms en ’n tweede man en sy meisie vir poging tot moord en die onwettige besit van ammunisie, in hegtenis geneem.
In die vroeë oggendure van 8 Maart het lede van dié eenheid ’n man wat vir poging tot moord en die rig van ’n vuurwapen gesoek is, opgespoor en in hegtenis geneem. Dié saak hou verband met ’n skietvoorval by ’n taverne in Thabong verlede maand.
Die 27-jarige verdagte is in hegtenis geneem by ’n gedeelde woning in Thabong wat aan sy meisie behoort. ’n Soektog op die perseel is gedoen en polisielede het op tien rondtes van ’n .38 spesiale vuurwapen beslag gelê. Polisielede het ook ’n 23-jarige vrou in hegtenis geneem en van die onwettige besit van ammunisie aangekla.
Tydens ’n tweede optrede op 8 Maart het lede van die eenheid inligting ontvang oor ’n huis in Thabong wat vir dwelmhandel gebruik word.
Hulle het ’n man vir die besit van dwelms in hegtenis geneem, nadat pakkies tik, CAT, Mandrax tablette asook ’n onbekende bedrag kontant tydens die soektog gevind is.
Die 41-jarige verdagte het probeer om polisiebeamptes om te koop en ’n bykomende klag van omkopery is bygevoeg.
Die teenbende-eenheid het op 11 Maart ’n optrede by die N1-vragmotor-ruspunt in Ventersburg uitgevoer. Dit volg ná die groot aantal sake wat by hierdie ruspunt geopen is, en die aanvalle op vragmotorbestuurders daar. Die optrede was daarop gemik om misdade soos aanranding, die diefstal van motorvoertuie en die besit van gevaarlike wapens aan te spreek.
Die 12 uur lange veldtog is op 9 Maart tussen 09:00 tot 21:00 uitgevoer. Vyf verdagtes tussen 26 en 31 jaar oud is in hegtenis geneem: drie vir die besit van gevaarlike wapen en een vir diefstal uit motorvoertuig en aanranding.
