Toe Bloemwater vir Sedibeng Water in 2022 oorgeneem het, het hulle ook ’n uitgeputte bankrekening en ’n Matjhabeng skuld van R5,2 biljoen oorgeneem.
Bloemwater het ’n aanbieding vir die Matjhabeng raadsvergadering op 28 Maart gedoen.
Manie Pretorius, Vryheidsfront Plus-raadslid in Matjhabeng, sê Bloemwater het al die skuld van Sedibeng geërf.
“Matjhabeng se maandelikse rekening beloop tussen R50 miljoen en R60 miljoen, en Matjhabeng vorder tussen R4 miljoen en R8 miljoen in van die inwoners. Dit beteken dat maand vir maand die skuld by Bloemwater ophoop,” sê hy.
Dit het by die vergadering geblyk dat daar vir meer as 15 jaar geen onderhoud deur Sedibeng en Bloemwater aan Matjhabeng se waterpypleidings gedoen is nie.
Van die pype is in gebruik sedert 1945, en daar is tans verskeie pompe buite werking.
Bloemwater sê daar is slegs twee van die drie waterpype vanaf Balkfontein in werking, en dat daar ongeveer 10,56% van die water wat by Bloemwater aangekoop word, verlore gaan voor dit uiteindelik die eindgebruiker bereik.
Daar is sedert 2013 geen ooreenkoms oor die diensplan tussen Sedibeng en Bloemwater rakend die kruis-koppelings tussen pompe en pype in ’n poging om die munisipaliteit se dienslewering te verbeter.
Die nuutste ergenis vir Matjhabeng-inwoners is die rantsoeneer van water wat toegepas word waar kleppe na woonbuurte gedurende die aande toegemaak word in ’n poging om watervlakke te verhoog.
“Die vooruitskatting is dat die waterprobleem vir nog ’n maand met ons sal wees,” sê Pretorius.
Daar word ’n vergadering vir volgende week beplan, waar die minister van Water en Sanitasie, verteenwoordigers van Bloemwater sowel as Matjhabeng Munisipaliteit, en verskeie raadslede teenwoordig sal wees.
