Verskillende wetstoepassers is ontplooi om onwettige mynbou in die Vrystaat te polisieer.
Dinsdag 29 Oktober het lede van die Suid-Afrikaanse Polisiediens (SAPD), Suid-Afrikaanse Nasionale Weermag (SANW) en private sekuriteitsmaatskappye ’n 64-jarige man in besit van vermoedelik gesteelde eiendom, in hegtenis geneem.
Die verdagte is in die Beatrix-goudmyn gebied opgemerk en in hegtenis geneem. Hy het ’n groot hoeveelheid koperkabel, wat agterop ’n vermoedelik gesteelde wit Corsa-bakkie gelaai was, in sy besit gehad.
“ ’n Saak van besit van vermoedelik gesteelde eiendom, vir albei die koperkabel en motorvoertuig, en beskadiging of gepeuter met noodsaaklike infrastruktuur is by die Theunissen-polisiestasie oopgemaak,” sê lt. kol. Thabo Covane, polisiewoordvoerder.
Tydens ’n ander voorval is nege sekuriteitsbeamptes by die Kopanang-myn in hegtenis geneem. Hulle het na bewering onwettige mynwerkers bygestaan.
Toe die polisie die verdagtes deursoek het, het hulle het op smokkelgoedere soos BronCleer-hoesstroop, spaghetti, rys, brood en soja-maalvleis gevind en ook vyf selfone is gekonfiskeer. ’n Saak van sameswering om misdaad te pleeg, met bykomende aanklagte van oortreding van myngesondheid-en-veiligheid en geldwassery word ondersoek, sê Covane.
Die verdagtes sal binnekort in die hof verskyn.
