- Wreed deur ex loseerder aangeval
- Vrou eis R1000 en toe val sy slagoffer met ‘n gebreekte wynbottel aan
- Die aanvaller sal van poging tot moord aangekla word
____________________________________________________________________________________________
’n Vrou van Hennenman is Saterdagmiddag verskeie kere met ’n gebreekte bottel in haar kop, nek en gesig gesteek.
Lenie Schoeman (69) se vermeende aanvaller, ’n 50-jarige vrou, het voorheen by haar geloseer.
Schoeman sê die aanvaller het met die voorval op 28 Oktober geëis dat sy haar R1 000 gee.
Toe sy weier, het die vrou haar met ’n wynbottel begin aanrand.
Die vrou het ook ’n ander bottel gebreek en haar daarmee begin steek.
Sy het gesê sy gaan Schoeman doodmaak as sy nie vir haar geld gee nie.
In ’n stadium het die vrou Schoeman glo in die bad in probeer dwing om haar te verdrink.
Schoeman het toe die vrou weg is na haar buurvrou gekruip.
Sy het heelwat bloed verloor, en die buurvrou het ’n ambulans ontbied.
Schoeman is Maandag uit die hospitaal ontslaan en het ’n klag by die polisie ingedien.
Die vermeende aanvaller het volgens inwoners voor die tyd van die aanval eers op ander plekke in die dorp geld gebedel.
Kapt. Stephen Thakeng, polisiewoordvoerder, sê die aanvaller is Maandagmiddag in hegtenis geneem en sal van poging tot moord aangekla word.
