’n Multidissiplinêre taakspan in die Vrystaat het ’n 38-jarige man wat besig was om goudhoudende materiaal te verwerk naby die Jabulane-hostel, Thabong, in hegtenis geneem.
Hy was besig om gouderts van sand te skei met ’n tydelike hellingstafel. Daar is beslag gelê op vermoedelik gouddraende materiaal van 13,88 kg. ’n Saak van besit van vermoedelik goudhoudende materiaal met ’n bykomende klag van oortreding van die Immigrasiewet is by die Thabong-polisiestasie geopen.
Die samewerking tussen die polisie en private sekuriteitsmaatskappye by die Kopanong-myn lewer ook steeds goeie resultate.
’n Werknemer van die myn is gevind met smokkelgoedere soos grondboontjies, sojamaalvleis en kitspap. Die werknemer het erken dat die kos bedoel was om aan onwettige, ondergrondse mynwerkers te verkoop.
’n Saak van sameswering om misdaad te pleeg (in hierdie verband, hulp aan onwettige mynwerkers) met ’n bykomende klag van oortreding van die Wet op Myngesondheid en -veiligheid is by die Vierfontein-polisiestasie geopen.
