Die polisie in die Vrystaat het meer as 1 200 verdagtes inhegtenis geneem tydens ’n multi-dissiplinêre optrede tussen 18 Junie en 2 Julie.
Misdade soos die besit van onwettige vuurwapens, moord, verkragting, motor- en vragmotorkapings, rooftogte soos intransito is ondersoek. Die polisie het ook verdagtes opgespoor, wat gesoek word vir misdade soos geslagsgebaseerde geweld, moord van vroue, beskadiging van infrastruktuur en veediefstal.
Meer as 10 000 mense en 4 820 voertuie is deursoek.
Die polisie het ook skrootwerwe en tweedehandse winkels besoek, waar verskeie verdagtes inhegtenis geneem is. Verkeersbeamptes het boetes uitgereik waar bevind is dat bestuurders die verkeerswet oortree het.
Daar is ook op dwelms soos nyaope, chrystal meth en Mandrax beslag gelê.
Twee gesteelde voertuie is teruggevind en verdagtes is in hegtenis geneem.
Verhoogde landelike veiligheidsoperasies is uitgevoer waar plaaspatrollies verskerp is en verdagte mense en voertuie is deursoek.
