’n Man is in hegtenis in geneem weens die besit van khat-dwelmplante ter waarde van R2,4 miljoen.
Die Hennenman- en Ventersburg-polisielede was besig om inligting op te volg ná ’n wenk wat ontvang is oor ’n vragmotor met khat-plante wat op Sondag 3 Maart van Johannesburg na Kaapstad gereis het.
Die Bloemfonteinse blitspatrollie is in kennis gestel en die vragmotor is by die Verkeerdevlei-tolhek opgemerk.
Die vragmotor is deursoek en 14 bokse khat is gevind.
’n Verdagte (59) is in hegtenis geneem.
Hy het saam met ’n 34-jarige buitelander gereis. Dié man is aangekla omdat hy die land onwettig binnegekom het. Die polisie se ondersoek wys dat die buitelander nie deel was van die vervoer van die khat-plante nie.
Altwee verdagtes het op 11 Maart in die Brandfort-landdroshof verskyn en die vragmotorbestuurder se saak is na 2 Julie uitgestel. Borgtog van R500 is aan hom toegestaan.
Die buitelander het reeds in die hof verskyn en bly in aanhouding.
