’n Verdagte (50) is deur die Valke se Ernstige Georganiseerde Misdaad-ondersoekspan in Welkom, saam met die Kroonstad-hoofwegpatrollie, vir die besit van perlemoen in hegtenis geneem.
Op Dinsdag 5 Julie is inligting deur die Valke se Ernstige Georganiseerde Misdaad-ondersoekspan in Bloemfontein ontvang oor die verdagte wat besig was om perlemoen van die Vrystaat na Gauteng te vervoer.
Lede van Welkom se Ernstige Georganiseerde Misdaad-ondersoekspan en die Kroonstad-hoofwegpatrollie se hulp is ingroep. Hulle het die Tata-vragmotor gevolg en dit by ’n vulstasie in Kroonstad gestop. Tydens die deursoeking van die vragmotor het die polisie 26 bokse perlemoen ontdek met 8 381 eenhede ter waarde van meer as R22 miljoen.
Daar is beslag gelê op die perlemoen, die vragmotor en R25 000 kontant, wat in die verdagte se besit gevind is.
