Die impak van die komende instandhoudingssluiting van die Lesotho Hoogland-waterskema op Vrystaatse inwoners sal fyn dopgehou word.
Die Trans-Caledon Water Owerheid sal watervloei na Suid-Afrika vanaf Oktober 2024 opskort vir ’n voorgestelde tydperk van ses maande om noodsaaklike instandhouding en konstruksiewerk in Lesotho te vergemaklik.
Baie gemeenskappe in die Vrystaat maak staat op water uit die kanaal, wat in die Asrivier tussen Clarens en Bethlehem uitloop en deur verskeie riviere na Gauteng vloei. Dié sluiting sal na verwagting die watertoevoer na dorpe en landbousektore in die Vrystaat aansienlik verminder.
’n Afvaardiging, bestaande uit die DA-adjunkwoordvoerder vir water en sanitasie, Stephen Moore, saam met Vrystaatse Wetgewerlede Roy Jankielsohn en David Mc Kay, en Dihlabeng-raadslede Irene Rugheimer en Hilton Maasdorp, het onlangs met inwoners in Clarens vergader om potensiële risiko’s te bespreek, en toesig te hou by die Asrivier-uitloop.
Inwoners van Clarens het kommer uitgespreek oor die stadige vordering met die toerusting van bykomende boorgate en die vestiging van die nodige infrastruktuur om ’n betroubare watertoevoer tydens die sluiting te verseker. Luidens ’n antwoord in die Nasionale Raad van Provinsies is R9,7 miljoen bewillig vir ses boorgate om water vir Clarens en Kgubetswana aan te vul.
Die regering maak staat op seisoenale reën om die impak van die sluiting te versag, terwyl hulle ook beplan om water uit die Sol Plaatjie- en Sterkfonteindam in die Liebenbergsvlei- en Wilgerivier oor die komende maande vry te laat. Die DA is egter bekommerd oor potensiële gesondheidsgevare wat voortspruit uit die ophoping van rou riool in dié riviere weens wanfunksionele munisipale rioolstelsels. Die water uit die kanaal help gewoonlik om die riool te verdun, sodat dit wegvloei van geaffekteerde dorpe.
Die DA sal verpligtinge wat deur die Nasionale Departement van Water en Sanitasie en munisipaliteite gemaak is aktief monitor om die gevolge van die sluiting van die kanaal te versag. DA-verteenwoordigers in die Nasionale Vergadering, NCOP, Vrystaatse Wetgewer en plaaslike rade sal deur die hele proses aanspreeklikheid en toesig verseker.
