Kyk na jou werknemers se agtergronde voordat hulle toegang tot kinders kry.
Werkgewers wat enige soort diens aan kinders lewer, het ’n plig om hul werknemers te ondersoek voordat hulle toegang verleen tot die perseel waar kinders teenwoordig is.
Ouers word toegelaat om ’n werkgewer te vra om te bewys dat hulle hul werknemers wat op die perseel met kinders is, gekeur het voor aanstelling.
Volgens adv. Salome Scheepers, senior staatsadvokaat van die Nasionale Vervolgingsgesag (NVG) gebaseer by die eenheid vir seksuele misdrywe en gemeenskapsake (SOCA), is dit noodsaaklik om ’n polisieverklaring te verkry voordat iemand in diens geneem word wat toegang tot kinders sal hê soos sportafrigters en begeleiders op ’n skooltoer.
“Dit sluit ook mense in wat nie direk by kinders betrokke is nie, soos tuiniers en skoonmakers.”
“Die Nasionale Kinderbeskermingsregister (NCPR) en die Nasionale Register van Seksoortreders (NRSO) is ontwerp om kinders te beskerm en is noodsaaklike hulpmiddels om te gebruik wanneer individue gekeur word voordat hulle toegang tot kinders kry. Alhoewel hierdie registers nie oop is vir die algemene publiek nie, word ouers weens die sensitiewe inligting wat dit bevat, toegelaat om werkgewers vir bevestiging te vra om te kyk of hulle werknemers sif,” sê Scheepers.
Scheepers het die webinar-reeks van die motorbedryfpersoneelvereniging (Misa) afgesluit met ’n pleidooi aan ouers om hul waardes te identifiseer en om dieselfde te soek in die mense met wie hulle interaksie het.
Misa het ’n daaglikse webinar-reeks ontwerp vir die duur van jaarlikse 16-dae van aktivisme teen geslagsgeweld met die tema “geslagsgeweld en vrouemoord eindig by ons.”
Volgens Scheepers word byna 50 vroue in Suid-Afrika elke dag vermoor, maar vrouemoord kan voorkom word as onder meer die gebrek aan bewustheid aangespreek word.
“Herken rooi vlae wat swak karakter aandui soos oneerlikheid, gebrek aan aanspreeklikheid en onetiese praktyke. Wees doelbewus oor jou kring en streef altyd na mense wat jou sal inspireer en motiveer om te groei,” sê Scheepers.
Sy het die publiek aangemoedig om ondersteuningsdienste en blitslyne wat tot hulle beskikking is, te gebruik soos die 65 Thuthuzela-sorgsentrums landwyd, Crime Stop by 08600-10111, die bevelsentrum vir geslagsgeweld by 0800-428-428 of die hulplyn vir huishoudelike geweld by 0800-150-150.
“Slagoffers van gesinsgeweld wat hulp nodig het, kan ook die National Shelter Movement of South Africa se 24-uur tolvrye hulplyn kontak by 0800-001-005. Dit is die eerste nasionale hulplyn wat uitsluitlik toegewy is om slagoffers van huishoudelike mishandeling toegang te verkry tot skuilingdienste in elke van die nege provinsies, terwyl hulle ook help met ’n verskeidenheid ander kwessies wat oorlewendes raak,” sê Scheepers. – Uitgereik deur Sonja Carstens, bestuurder van Misa se media- en kommunikasie-afdeling.
