Die vordering van twee hofsake wat verband hou met seksuele misdrywe teen kinders, en ook dieremishandeling, bly op die voorgrond van die Goudveldse gemeenskap.
Die borgtogaansoek van die hoërskoolonderwyser (38) en sy vriendin (33), wat albei voor die hof verskyn op aanklagte wat verband hou met seksuele oortredings met kinders, is na Vrydag 25 Oktober uitgestel. Hulle bly in aanhouding.
Die eerste aanklag behels verkragting; seksuele aanranding; algemene aanranding; en blootstelling, vertoning, of om die blootstelling of vertoning van pornografie aan kinders toe te laat.
Die tweede aanklag is seksuele aanranding en seksuele gereedmaking van ’n kind.
Albei beskuldigdes is op 13 September in hegtenis geneem. Die slagoffers is twee meisies, van drie en vier jaar oud, en ’n seun van ses. Twee van die slagoffers is reeds in 2021 van die vrou weggevat en mag net by hul ma kuier.
Die man is ’n onderwyser by ’n spesiale skool in Welkom, en sy vriendin is by gemeenskapspolisiëring betrokke.
In die tweede saak word ’n pastoor (67) van Odendaalsrus van die verkragting van ’n minderjarige meisie aangekla.
Sy vrou word daarvan aangekla dat sy van die voorval kennis gedra het, maar versuim het om dit by die owerhede aan te meld. Die egpaar word ook aangekla van dieremishandeling, wat tot die dood van ’n hond gelei het, en aanranding op die hond se eienaar.
Hulle het albei hul borgtogaansoek laat vaar en bly in aanhouding.
’n Varkhond is meer as 50 keer met messe gesteek en is as gevolg van die voorval dood.
Die egpaar het na bewering ook die hond se eienaar tydens die aanval op die hond aangerand terwyl sy probeer het om haar troeteldier te beskerm.
Sy het op ’n stadium bo-op die hond gaan lê.
Die egpaar het op 25 September saam in die hof verskyn, waar die nuwe aanklagte (verkragting en versuim om die seksuele aanranding van ’n minderjarige aan te meld) by die bestaande aanklagte van aanranding en dieremishandeling gevoeg is.
Die saak is tot 30 Oktober uitgestel.
