Jan Jacobs, alombekend as die man wat nie skroom om sy hande vuil te maak nie, en sy Move One Million-span, sit altyd skouer aan die wiel om die Goudvelde skoon te maak.
Hulle het Vrydag vir Burenstraat (by die Pienkkruis) in Dagbreek, Welkom, aangepak.
“Dit het weer soos ’n vullishoop daar gelyk, iemand moes iets doen,” sê hy.
Jacobs maak oral reg waar hy sien die omgewing is vuil. Hy en sy span staan nooit terug vir ’n groot taak nie. Hulle sal nooit sleg praat of grootpraat nie, maar stilletjies inspring en gate opvul, vullis wegdra en die omgewing opruim. Jan en sy span se leuse is “saam kan ons dit doen.”
Middel September het hulle die groot onooglike en baie gevaarlike gat binne-in die sirkel by The Strip opgevul. Die gat is deur ’n gebarste pyp veroorsaak, wat later amper gru-ongelukke veroorsaak het.
Ook in September het twee jong mense, Crystal Mumfort en Andries van Rhyn, Jacobs met ’n ander groot straat-teerprojek in Odendaalsrus gehelp.
Hulle het nie net self die gat opgevul nie, maar ook daarna dit met ’n laag teer afgerond. Motoriste wat onbewus was van die wedywer sou nie eens besef het van die harde werk wat sonder vergoeding gedoen is nie.
Aan die begin van September het Jacobs en sy mense Odendaalsrus aangepak en die strate daar mooi skoon gemaak en sakke vol vullis verwyder.
