’n 50-jarige verdagte is deur die Valke se Ernstige Georganiseerde Misdaad-ondersoekspan in Welkom, saam met Kroonstad-hoofwegpatrollie, vir die besit van perlemoen, in hegtenis geneem.
Op Dinsdag, 5 Julie is inligting deur die Valke se Ernstige Georganiseerde Misdaad-ondersoekspan in Bloemfontein ontvang oor die verdagte wat besig was om perlemoen van die Vrystaat na Gauteng te vervoer.
Lede van Welkom se Ernstige Georganiseerde Misdaad-ondersoekspan en die Kroonstad-hoofwegpatrollie se hulp is ingroep.
Hulle het die vragmotor gevolg en dit by ’n vulstasie in Kroonstad gestop. Tydens die deursoeking van die Tata-vragmotor het die polisie 26 bokse perlemoen ontdek vol 8 381 eenhede ter waarde van meer as R22 miljoen.
Daar is beslag gelê op die perlemoen, die Tata-vragmotor en R25 000 kontant, wat in die verdagte se besit gevind is. Die verdagte sal na verwagting binnekort in die hof verskyn.
